प्रवास दुबई, यूएई— कुमाल समाज युएईले १३ जनवरी २०२६ मा आफ्नो प्रथम माघे संक्रान्ति पर्व सांस्कृतिक कार्यक्रमसहित सम्पन्न गरेको छ। कार्यक्रममा कुमाल भाषा, कला र संस्कृतिको संरक्षण तथा संवर्धन गर्ने उद्देश्य राखिएको थियो।
कार्यक्रमको मूल नारा “हाम्रो संस्कृति हाम्रो शान, कुमाल जाती हाम्रो पहिचान” रहेको थियो। कार्यक्रममार्फत प्रवासी कुमाल समुदायले आफ्नो मौलिक धर्म, संस्कार, परम्परा र संस्कृतिको जगेर्ना गर्ने प्रतिबद्धता व्यक्त गरेका छन्।
कुमाल समाज युएईका निबर्तमान महासचिव जोनु कुमालले माघे पर्वको ऐतिहासिक, सांस्कृतिक र सामाजिक महत्वबारे चर्चा गर्दै उपस्थित सबैलाई स्वागत गरेका थिए। प्रमुख अतिथि नेपाल आदिवासी जनजाती महासंघ युएईका अध्यक्ष भागीरथी कुमार भगतले कम संख्यामा भएता पनि कुमाल समाजले निरन्तर आफ्नो भाषा, कला र संस्कृतिको संरक्षणमा योगदान दिनुपर्नेमा जोड दिनुभयो।
कार्यक्रममा नेफिन युएईका मिस्टर किशन लाल चौधरी लगायत स्थानीय कलाकारहरूले सांगीतिक तथा सांस्कृतिक प्रस्तुति दिएका थिए। कार्यक्रमको सफलतापूर्वक सञ्चालनमा विभिन्न संघ संस्था र संरक्षकहरूको विशेष उपस्थिति रहेको थियो।
कार्यक्रमको अवसरमा कुमाल समाज युएईको कार्यसमितिमा सास्कृतिक विभाग प्रमुख अनिश्मा कुमाल र सदस्यहरू कुसुम कुमाल, सन्त बहादुर कुमाल, बिष्णु कुमाल, सृजना कुमाल र मनिषा कुमाल निर्बाचित भएका छन्।
कार्यक्रम अध्यक्ष राजु कुमालको नेतृत्वमा सम्पन्न भएको थियो र कुमाल समुदायले आफ्नो कला, भाषा, धर्म तथा परम्परालाई संरक्षण गर्दै अघि बढाउने प्रतिबद्धता व्यक्त गरेको छ।
