रौतहट, असार ३१। रौतहटमा सरकारी निकायको ढिलासुस्ती र विकास निर्माणप्रतिको बेवास्ताका कारण किसानदेखि सर्वसाधारणसम्म आक्रोशित बनेका छन्। एकातिर सरकारले उपलब्ध गराउने उखु अनुदान रकम समयमै निकासा नहुँदा किसान आन्दोलनमा उत्रिएका छन् भने अर्कोतर्फ झाँझपुल–कटहरिया–बिर्ती सडकको जीर्ण अवस्थाले हजारौं नागरिकको दैनिक जनजीवन प्रभावित बनेको छ।
उखु किसानहरूले प्रतिक्विन्टल ७० रुपैयाँका दरले उपलब्ध गराइने सरकारी अनुदान रकम समयमै सुनिश्चित नभए करिब सात करोड रुपैयाँ बराबरको अनुदान फ्रिज हुने खतरा रहेको भन्दै आन्दोलन सुरु गरेका छन्। किसानका अनुसार सम्बन्धित निकायबाट आवश्यक सिफारिस प्रक्रिया पूरा हुन नसक्दा अन्य जिल्लाका किसानले अनुदान पाइसक्दा पनि रौतहटका किसान भने अझै प्रतीक्षामै छन्। यस विषयमा उखु किसान संघ रौतहटका अध्यक्ष अशोक यादवले प्रशासनिक ढिलासुस्तीका कारण किसान अन्यायमा परेको बताए। किसानहरूले गौर–चन्द्रनिगाहपुर सडकखण्डअन्तर्गत गरुडा नगरपालिका–स्थित झाँझ पुलमा टायर बालेर सडक अवरुद्ध गर्दै सरकारसँग तत्काल अनुदान भुक्तानीको सुनिश्चितता गर्न माग गरेका छन्।
यता प्रमुख जिल्ला अधिकारी दिनेशसागर भुसालले प्रक्रिया पूरा हुन ढिलाइ भएका कारण समस्या उत्पन्न भएको स्वीकार गर्दै सम्बन्धित मन्त्रालयसँग समन्वय भइरहेको र समाधानका लागि पहल जारी रहेको बताएका छन्। यता जिल्लाकै अर्को प्रमुख समस्या बनेको झाँझपुल–कटहरिया–बिर्ती सडक वर्षौंदेखि मर्मत नहुँदा स्थानीयवासीले तत्काल स्तरोन्नतिको माग गरेका छन्। गौरसँग जोडिने यस महत्त्वपूर्ण सडकमा ठूला–ठूला खाल्डाखुल्डी, हिलो र धुलोका कारण दैनिक आवागमन अत्यन्त कष्टकर बनेको छ। स्थानीयका अनुसार सडकका कतिपय स्थानमा चारदेखि छ फिटसम्म गहिरा खाडल बनेका छन्। वर्षाको समयमा ती खाडलमा पानी भरिने भएकाले दुर्घटनाको जोखिम झन् बढेको छ।
मोटरसाइकल चालक, एम्बुलेन्स, विद्यालय बस, सार्वजनिक यातायात तथा कृषि उपज बोकेका सवारी साधन सबैभन्दा बढी प्रभावित भएका छन्। सडकको खराब अवस्थाले ढुवानी सेवा प्रभावित हुँदा व्यापारीको व्यवसायमा असर परेको छ भने किसानले उत्पादन गरेका कृषि उपज समयमै बजारसम्म पुर्याउन नसक्दा आर्थिक क्षति व्यहोर्नुपरेको बताएका छन्। गर्मीयाममा सडकबाट उड्ने अत्यधिक धुलोका कारण स्थानीय बासिन्दामा श्वासप्रश्वाससम्बन्धी समस्या बढ्दै गएको गुनासो पनि रहेको छ। जनता समाजवादी पार्टी (जसपा) का केन्द्रीय सदस्य हृदय नारायण दासले झाँझपुल–कटहरिया–बिर्ती सडक यस क्षेत्रको जीवनरेखा भएकाले यसको मर्मतमा अब थप ढिलाइ गर्न नहुने बताएका छन्।
उनले सडकको तत्काल मर्मत, पानी निकासको उचित व्यवस्था तथा दीर्घकालीन रूपमा गुणस्तरीय स्तरोन्नति गर्न सम्बन्धित निकायसँग माग गरेका छन्। स्थानीयवासीले पटक–पटक सम्बन्धित कार्यालयको ध्यानाकर्षण गराउँदा पनि प्रभावकारी काम हुन नसकेको गुनासो गर्दै अब पनि बेवास्ता गरिए चरणबद्ध आन्दोलनका कार्यक्रम घोषणा गर्ने चेतावनी दिएका छन्। रौतहटका नागरिकको साझा गुनासो एउटै छ—सरकारले विकास निर्माण र किसानका समस्यालाई प्राथमिकतामा नराख्दा जनताले सास्ती भोग्नुपरेको छ।
स्थानीयको माग छ, उखु किसानको अनुदान रकम तत्काल उपलब्ध गराइनुका साथै झाँझपुल–कटहरिया–बिर्ती सडकको मर्मत र स्तरोन्नतिको काम अविलम्ब सुरु गरियोस्, ताकि नागरिकले सुरक्षित र सहज रूपमा आवागमन गर्न सकून्।
