कपिलवस्तु । केही दिनअघि उद्योग वाणिज्य संघ कृष्णनगरका अध्यक्ष रितेश शर्मामाथि घरमै कुटपिट भएको घटनापछि जिल्ला प्रहरी कार्यालयमा ज्यानमार्ने उद्योग सम्बन्धी उजुरी दर्ता गरिएको थियो। उक्त उजुरीमाथि प्रारम्भिक सुनुवाइ गर्दै कपिलवस्तु जिल्ला अदालतले प्रतिनिधि सभा सदस्य अभिषेक प्रताप शाह र कृष्णनगर नगरपालिकाका नगरप्रमुख रजत प्रताप शाहलाई पक्राउ गरी अनुसन्धान गर्न आदेश जारी गरेको जनाएको छ।
घटनापछि कृष्णनगर नगरपालिका–११, झिंगाहा चोक क्षेत्रका अधिकांश पसलहरू बन्द भएका छन् । स्थानीय व्यापारीहरूका अनुसार घटनामा केवल सांसद अभिषेक प्रताप शाह र नगरप्रमुख रजत प्रताप शाहमाथि मात्र मुद्दा दर्ता गरिएको विषयमा विभिन्न आशंका उत्पन्न भएकाले निष्पक्ष छानबिनको माग गर्दै स्वस्फूर्त रूपमा पसल बन्द गरिएको हो।
व्यापारीहरूले दुवै पक्षलाई अनुसन्धानको दायरामा ल्याई सत्यतथ्य छानबिन गर्नुपर्ने र न्यायिक प्रक्रिया निष्पक्ष ढंगले अगाडि बढाउनुपर्ने माग गरेका छन्। झिंगाहा चोक क्षेत्रको व्यापारिक गतिविधि प्रभावित हुँदा बजार क्षेत्र सुनसान देखिएको छ। घटनाबारे थप अनुसन्धान भइरहेको प्रहरी स्रोतले जनाएको छ।
अदालतको आदेश कार्यान्वयन तथा घटनाको वास्तविकता पत्ता लगाउन सम्बन्धित निकायले आवश्यक प्रक्रिया अघि बढाइरहेको बताइएको छ ।
